Ekki hross

Ég hélt að allir vissu að betra orð yfir „hross“ er „hryssa.“ Alveg er ég viss um að sá sem skrifaði greinina býr í Kópavogi þar sem engir hestar búa. Annars finnst mér skrítið að þessi ísbjörn hafi verið að álpast þarna upp á hálendi Íslands á þessum tíma árs, ég vona að þeir finni hann fljótlega áður en hann finnur einhvern annan.

Kötturinn minn, sem heitir Hrellir, skildi einu sinni eftir sig spor í garði nágrannans, en enginn kallaði út björgunarsveitir og lögreglu enda er hann prýðisköttur sem skilur ekki eftir sig djúp spor.

Hálendisbjörn trúlega hross

Ömurlegt drasl

Ég nota aðeins Internet Explorer vafrann, enda er hann frá hinu fína fyrirtæki Microsoft sem býr til allar góðar tölvuvörur í heiminum. Ég skil ekki af hverju einhver reynir að búa til vöru sem á að vera betri en sú besta og það án þess að rukka fyrir! Það er augljóst að þannig tilraunir eru dæmdar til að mistakast.

Kötturinn minn, sem heitir Hrellir, er hrifnari af Firefox vafranum en það er eitt af fáum málum sem við erum ósammála um.

Firefox stefnir á met

Viltu ís, Björn?

Ég mátti nú til með að gantast smá, þó málið sé alvarlegt. Fyrir þá sem ekki skilja grínið, þá gæti einhver sagt þessa setningu við mann eða dreng sem heitir Björn þegar hann býður honum ís. Það er þó ekki það sem er kómískt við þetta, heldur er það vegna þess að setningin hljómar eins og maður sé að segja: „Viltu ísbjörn?“ Það er hins vegar fyndið af því að engum dytti í hug að bjóða öðrum ísbjörn, hvað þá að þiggja eitt stykki! Sumir segja að grín sé ekki lengur fyndið eftir að það er búið að kryfja það en mér finnst það ekki eiga við í þessu tilfelli.

Ég á kött, sem heitir Hrellir, og hann kallaði mig einu sinni viðbjóð eftir að ég hafði boðið honum afgangs við til að brýna klærnar á. Mér fannst það ekkert fyndið.

 

Ísbjörn í æðarvarpi

Drepum kvikindið!

Nú er nóg koimið af bjarndýrum á okkar hreina og fína landi. Nú skulum við gera þessu dýri bjarnargreiða og vona að þá verði björninn loks unninn. Það er bara eins gott að þá muni hann ekki launa okkur gráan björn fyrir rauðan því þar liggur björninn grafinn.

Ég er samt feginn því að kötturinn minn, sem heitir Hrellir, er ekki köttur í bóli bjarnar. Þá myndu bændur liggja í því. 

Grunur um annan ísbjörn

Mesti jarðskjálfti Íslands!

ÉG ER Í MIKLU UPPNÁMI NÚNA ÞVÍ ÉG HEF ALDREI FUNDIÐ EINS MIKINN JARÐSKJÁLFTA OG ÞENNAN ÁÐUR! HÉR HRISTIST ALLT OG SKALF OG UPPÁHALDSBOLLINN MINN DATT Á GÓLFIÐ EN SEM BETUR FER BROTNAÐI HANN EKKI! Á STUNDU SEM ÞESSARI ÞAKKAR MAÐUR SÍNUM SÆLA FYRIR AÐ VERA Á LÍFI, EN NÚNA VEIT MAÐUR HVERNIG TILFINNING ÞAÐ ER AÐ VERA VIÐ DAUÐANS DYR!

Kettinum mínum, sem heitir Hrellir, brá mjög við þennan jarðskjálfta og hann gat ekki fengið sig til að borða né drekka í smá stund eftir þetta. Hann er samt búinn að borða núna og er farinn að leggja sig. 

Jarðskjálfti á Suðurlandi

Rétt ákvörðun

Nú veit ég ekki mikið um þessa söngkonu en ég tel að þarna hafi hún veðjað á réttan hest. Brúðkaup er ein mesta peningasóun sem hægt er að hella sér út í þar sem fólk skilur hvort eð er stuttu seinna. Þetta ætti bara að vera þannig að fólk hringi inn til skattsjóra og tilkynni að það sé ennþá gift. Brúðkaupið sjálft gæti þá verið framkvæmt í gegnum síma á skrifstofutíma. Ef fólk vill bjóða gestum þá væri það ekkert mál því nútíma símtól eru búin hátölurum þannig að allir geta heyrt hvað er að gerast. Þetta myndi líka losa fólk við skilnaði því skatturinn skrári fólk skilið ef það hringir sig ekki inn einu sinni á ári.

Ég á kött, sem heitir Hrellir, og hann var einu sinni hrifinn af læðu hér í næsta húsi en hún leit aldrei við honum. Hún endaði svo undir bíl þannig að hann losnaði við allt vesenið í kringum brúðkaup og þess háttar. 

Carey hættir við annað brúðkaup

Hárrétt athugað

Íslenskar konur verða að fara að bæta sig ef þær ætla að ná aftur fyrsta sætinu í þessari keppni. Þær hafa verið að spila þetta allt of varnarsinnað að mínu mati og þess vegna hefur farið svona. Nú þarf bara að snúa vörn í sókn og taka þetta á næsta ári, það þýðir ekkert að hengja haus yfir þessu.

Kötturinn minn, sem heitir Hrellir, myndi vinna vinna allar fegurðarsamkeppnir sem hann tæki þátt í ef hann gæti það, hann er bara aðeins of þungur og fær því ekki keppnisrétt. 

Fegurstu konurnar ekki á Íslandi

Villa í fréttinni

Í fyrsta lagi er Höfði í eigu Reykjavíkurborgar og í öðru lagi er sett inn kolvitlaus mynd af einhverju allt öðru húsi. Mér finnst ristjórn mbl.is verða að vanda betur til verka og fá einhverja (eins og mig) til að lesa yfir fréttirnar áður en þær fara á vefinn. Þannig mætti koma í veg fyrir svona mistök.

Kötturinn minn, sem heitir Hrellir, er mjög vandaður köttur og hann gerir aldrei neitt nema að vel athuguðu máli. mbl.is mætti taka hann sér til fyrirmyndar. 

Höfði boðinn upp í dag

Bölvað rugl

Hverjum dettur í hug að flytja inn fíkniefni í okkar óspillta land? Fyrir utan það er krónan náttúrulega búin að hríðfalla í verði þ.a. ætlaður hagnaður af sölu þessara efna er mikið minni en áður hefði verið. Mér finnst að þessir aðilar hefðu átt að gera betri áætlanir áður en þeir fóru út í þetta, því nú stefnir alveg örugglega í gjaldþrot hjá þeim. Til dæmis væri sniðugt að fara í Háskólann í Reykjavík og læra að gera viðskiptaáætlanir því hefðu þeir gert eina þannig þá hefðu þeir líklega séð að innflutningur þessara efna var glapræði.

Kötturinn minn, sem ber nafnið Hrellir, er búinn að vera voðalega þreyttur síðustu daga en ég vona að það sé ekki vegna þess að hann sé kominn út í neyslu fíkniefna. 

Ekki tilviljun að hass fannst

Þetta er ekki fyndið!

Ég er alveg brjálaður yfir þessu „uppátæki.“ Hvernig dettur mönnum svona vitleysa í hug? Var Svarthöfði kristintrúar? Nei, ég held ekki. Fyrir utan þessa grófu sögufölsun þá finnst mér alveg forkastanlegt að koma svona fram við grey prestana sem þurfa núna að tala við fullt af fólki sem á í fjárhagserfiðleikum. Fyrir utan það náttúrulega að prestar eiga örugglega ekki sjálfir fyrir afborgunum af sínum íbúðum og bílum. Það er líka alger skrípaleikur að vera að klæða sig í svona fáránlegan búning bara til að labba nokkur skref að einhverri kirkju og gera grín að jesú og félögum hans.

Ég á kött, sem heitir Hrellir, og hann myndi aldrei láta sér detta í hug að klæða sig í svona fáránlegan búning. Hann getur ekki einu sinni gengið á afturfótunum. 

Svarthöfði á vegum félagsmanna í Vantrú