Fáránleg ályktun

Hvernig dettur þessum landsbyggðarlýð í hug að hafa skoðanir á svona málefnum? Það er ekki eins og þessi ísbjörn hafi gengið á land á landsbyggðinni. Þetta er algjörlega einkamál höfuðborgarbúa og þetta er viðkomandi knattspyrnuliði til skammar. Við höfum fullan rétt til að verja okkur gegn ágangi hvers konar bjarndýra; þau borða fiskinn okkar og skilja eftir för utan vega.

Ef kötturinn minn, sem heitir Hrellir, myndi ganga á land á Austfjörðum, myndu þeir þá skjóta hann? Ég vona svo sannarlega ekki.

KFÍ mótmælir drápi lukkudýrs félagsins

Hrókeringar hjá Frjálslyndum

Maður veit bara ekki lengur hvaðan á sig stendur veðrið. Fyrst Vilhjálmur Þ. Vilhjálmsson, svo Þórólfur Árnason og nú þetta. Hver verður svo borgarstjóri í mars 2010? Mér finnst að frjálslyndir verði að fara að ákveða sig hver verður borgarstjóri úr þeirra röðum, þetta er þeim til háborinar skammar. Svo er hefð fyrir því að karlar séu borgarstjórar og finnst mér það ekki rétti tíminn núna til að rjúfa þá hefð.

Kötturinn minn, Hrellir, er reyndar úr Mosfellssveit en hann er samt mikið á móti því að endalaust sé skipt um borgarstjóra.

Hanna Birna verður borgarstjóri

Eru svona fáir í þjóðkirkjunni?

Ég hélt að það væru yfir 150 þúsund manns í hinni evangelísku-kaþólsku þjóðkirkju sem er á Íslandi. Er þetta kannski enn einn sértrúarsöfnuðurinn sem er að slíta sig frá kirkjunni? Af hverju er þetta kallað félag leikmanna? Mér finnst að Jón Gnarr megi skammast sín fyrir að falsa söguna svona.

Kötturinn minn (hann heitir Hrellir) hefur miklar skoðanir á trúmálum og hann er eiginlega kaþólskari en páfinn þegar það kemur að því að vera búddisti.

Segja upp viðskiptum við Símann

Jóðl um miðja nótt?

Ég hef svo sem ekkert á móti málfrelsi en mér finnst kannski óþarfi að leyfa brjálaða Þjóðverjanum á hæðinni fyrir ofan að öskra allar nætur. Ég er nú þegar búinn að fá nóg af týrólamúsíkinni sem hann spilar allan liðlangan daginn.

Kötturinn minn, hann Hrellir, þarf á sínum fegurðarblundi að halda og hann verður ekki sáttur við þetta. 

Þjóðverjar mega fagna á kvöldin

GAS! GAS!

HVAR ER MAÐURINN MEÐ GASIÐ NÚNA?! NÚNA ÞURFA BORGARAR ÞESSA LANDS VIRKILEGA Á VERND LÖGREGLUNNAR AÐ HALDA. ÉG FER EKKI ÚT ÚR HÚSI FYRR EN SÉRSVEITIN ER BÚIN AÐ RÁÐA NIÐURLÖGUM ÞESSARAR SKEPNU! 
Annars á ég kött sem heitir Hrellir, og ég veit fyrir víst að hann er alls ekki hræddur við ísbirni.

Lögregla á slóðum ísbjarnarins

Burt með innflytjendur

Hver er ekki búinn að fá sig fullsaddan af þessum innflytjendum sem flæða yfir landið okkar? Þessi ísbjörn skal bara snauta aftur til síns heima og éta mörgæsir þar, því hann hefur engan skilning á íslenskri menningu og gæti aldrei plumað sig hérna.
Kötturinn minn, sem heitir Hrellir, hann myndi sko reka þennan ísbjörn heim til sín ef hann hann nennti, en honum finnst samt betra að borða og sofa.

Ísbjörn við Þverárfjall

Hvaða vitleysa!

Ég bý í Reykjavík og ég fann ekki neitt! Maður er farinn að halda að sumir séu gjarnir á að gera úlfalda úr mýflugu.
Kötturinn minn, sem heitir Hrellir, virtist a.m.k. ekki hafa tekið eftir neinu. 

Afar öflugur jarðskjálfti

Afmæli hjá úthverfi?

Mér finnst svolítið skrítið að það sé verið að halda upp á afmæli hjá einu úthverfi á höfuðborgarsvæðinu. Það eru nú ekki svo mörg ár síðan Hafnarfjörður sleit sig frá Reykjavík og fékk eigin bæjarstjórn. Kannski fer Grafarvogur að halda upp á 100 ára afmælið sitt bráðum? Mér finnst allavega fólk vera að gera allt of mikið úr ómerkilegum atburði.
Kötturinn minn (Hrellir) hefur engan áhuga á svona málum, hann vill miklu frekar borða fisk.

100 ára Hafnarfjörður

Þetta er út í hött

Mér finnste verið að gera lítið úr dánu fólki með þessu. Halda þessir vörubílstjórar, eða hvað sem þeir kalla sig þessa dagana, virkilega að það fólk hafi engar tilfinningar? Eins og skáldið góða sagði: „Við gerum ekki grín að dauðanum, hann gerir grín að okkur.“
Ég á kött sem heitir Hrellir, og ég veit það að ef hann væri dáinn þá myndi hann ekki vera ánægður með þessi mótmæli. 

Táknræn útför á Austurvelli

Má skrá hvern sem er í símaskrána?

Mér finnst þetta alveg út í hött. Símaskráin á að vera tól fyrir fólk til að finna heimilisföng og símanúmer, og hún er enginn staður fyrir grín eins og það að setja jólaköttinn þarna inn. Mér finnast þetta alveg forkastanleg vinnubrögð.
Ég á kött (hann ber nafnið Hrellir) og ég ætla mér að nýta mér þetta fordæmi til að skrá hann í símaskrána, þó hann sé ekki með eigin síma enn.

Jólakötturinn í símaskránni