Vonandi fer hann

Ég vona að hann fari frá þessu liði, ég er á þeirri skoðun að leikstíll hans henti ekki ítalska fótboltanum. Ég tel að best fyrir hann í stöðunni væri að spila í Danmörku eða Svíþjóð, þar er fótboltinn á mjög háu plani og þar eru fleiri ljóshærðir menn af norrænum uppruna sem ætti að henta honum betur. Svo legg ég til að hann ljúki ferlinum hér á Íslandi, hann gæti t.d. spilað síðustu árin með Fram eins og hann gerði hér á árum áður þegar hann var að jafna sig eftir meiðsli í nára sem hann fékk í Hollandi.

Kötturinn minn, sem heitir Hrellir, er mjög áhugasamur um fótbolta. Hann verður samt dauðhræddur ef ég rúlla fótbolta í áttina að honum, ég held honum finnist bara betra að horfa á hann í sjónvarpinu.

Arnór reiknar með að Eiður Smári fari frá Barcelona

Frábært hjá þeim

Mér finnst þetta alveg ótrúlega skemmtileg saga. Mér finnst frábært að Íslendingar séu loksins farnir að nýta nútímatækni við innkaup og ég vona svo sannarlega að fleiri muni nýta sér þennan skemmtilega ferðamáta. Til dæmis myndi þetta minnka umferðarteppur mikið ef fólk myndi frekar fljúga en fara á einkabílnum, og þannig minnkar að sjálfsögðu mengunin. Það væri því öllum landsmönnum til hagsbóta ef fleiri myndu nota þyrlur til að komast á milli staða.

Ég á kött, sem heitir Hrellir, og hann er ekki hrifinn af pylsum. Hann er heldur ekki hrifinn af því að fljúga þ.a. hann myndi ekki koma með mér ef ég færi á þyrlu út í búð að kaupa pylsur.

Þyrlan nýtt í pylsukaup

Hvernig geturðu látið svona gerast?

Mér finnst að Jesú eigi að skammast sín fyrir að hafa látið þetta gerast. Hann hefur oft áður bjargað fólki úr hvers kyns háska og ég skil ekki af hverju hann gerir það ekki nú. Ég vona þó að mönnunum líði vel, því enginn á skilið að lenda í svona slysi. Ég sendi því góðar kveðjur til þeirra sem lentu í þessu og vona innilega að þeir nái sér hratt og vel. Það hefði líka getað farið verr.

Ég á kött, sem heitir Hrellir, og hann er mjög leiður yfir því að þetta hafi gerst. Hann vill líka koma góðum kveðjum áleiðis til þeirra sem lentu í þessu leiðinlega slysi.

Klerkar í bílveltu

Léleg músík

Ég man eftir því þegar þessi hljómsveit var upp á sitt versta. Þá stundaði ég þá iðju að fara á skemmtistaðina til að dansa, en í hvert sinn sem lag kom með þessum kjötbolluétandi og húsgagnasmíðandi svíagrýlum þá settist ég niður úti í horni því þessi „lög“ fá lappirnar á mér bara alls ekki til að hreyfast. Ef Johnny Cash er hins vegar settur á fóninn þá fara fæturnir á mér í fimmta gír og ég dansa frá mér allt vit. Ég lofa því lesendum hér með að ég muni ekki fara á þessa kvikmynd. Ef ég slysast til að fara á myndina, þá ætla ég a.m.k. að sitja mjög kyrr í sætinu mínu.

Ég á kött, sem heitir Hrellir, og hann dansar aldrei við tónlist. Hann er svolítið vel í holdum, blessaður anginn, þannig að hann nennir ekki að hreyfa sig mikið að óþörfu. Þegar ég opna kattamatardós þá hins vegar skeiðar hann eins og vænsta hross, og þá er ekki að sjá að hann þurfi að grenna sig.

Aldrei saman á ný

Frábært framtak

Mér finnst það frábært framtak hjá Loga að raka af sér hárið til styrktar góðu málefni. Ég býst við því að kvenþjóðin verði yfir sig hrifin af þessu þar sem Logi hefur hingað til ekki verið þekktur fyrir að hafa fagurt hár. Það er ekki leiðum að líkjast fyrir hann, ég er með frekar þunnt hár og stundum raka ég það allt af upp á grínið.

Ég á kött, sem heitir Hrellir, og hann myndi aldrei leyfa mér að raka af sér hárið. Hann er samt svo vel í holdum að ég held að honum yrði ekkert kalt. Verst að Hrellir er ekki sjónvarpsmaður eins og Logi.

Náði takmarkinu en tapaði hárinu

Bullið í þessu liði

Ég hef þrennt við þetta að athuga: Í fyrsta lagi þá heitir þetta ekki Ingólfstorg, þetta hefur verið kallað Hallarniðsplanið síðan ég man eftir mér, vegna þess að áður fyrr stóð þarna hús Innréttingana sem var kallað Höllin. Í öðru lagi þá eru þegar þrjú hús þarna, eitt sem selur pylsur, annað sem selur samlokur og þriðja sem selur ís. Ef það hefur ekki truflað neinn hingað til þá sé ég enga ástæðu til þess að vera að bölsótast yfir einum kofa í viðbót.

Það er gaman að segja frá því að ég á kött (hann heitir Hrellir) sem hefur einu sinni farið með mér í göngutúr á Hallarniðsplanið. Honum fannst ekkert gaman að vera í bandi og svo er hann lítið gefinn fyrir að vera innan um fólk. Steininn tók svo úr þegar honum var bannað að spræna á súluna á torginu, þá vildi hann ólmur fara aftur heim.

Kaupmenn ævareiðir

Stór mistök!

Hvernig ætla þeir að koma slökkviliðssöngunni á lítið mótorhjól? Er enginn að hugsa dæmið til enda? Þeir hefðu átt að hringja í mig fyrst því ég hefði bent þeim á að það komast ekki margir lítrar af vatni á svona hjól og svo getur slangan ekki heldur verið stór. Þessi tilraun er dæmd til að mistakast og slökkviliðsmennirnir verða aftur komnir á fínu rauðu bílana innan skamms. Hvað verður gert við bílana á meðan, verða þeir seldir eða leigðir út? Spyr sá sem ekki veit.

Kötturinn minn, sem heitir Hrellir, reyndi einu sinni að kveikja í húsinu mínu með því að velta niður logandi kerti. Ég held enn þann dag í dag að það hafi verið viljandi, en hann vill meina að það hafi verið óvart. Þá var eins gott að slökkviliðsmenn voru ennþá að nota gömlu góðu bílana en ekki vélhjól.

Slökkviliðsmenn á vélhjólum

Ekki fyrsta parið

Þetta er yfirgengilega villandi fyrirsögn. Eiga þessar stúlkur virkilega að vera fyrsta samkynhneigða parið? Hvað með Hörð Torfa og Pál Óskar, Begga og Pacas, Davíð og Jón Baldvin, nú eða Njál og Gunnar? Mér finnst þetta samt frábært hjá þessum stelpum að gifta sig í kirkju þrátt fyrir að kirkjan hafi fordæmt samkynhneigð í næstum 2000 ár.

Ég á kött, sem heitir Hrellir, og hann er ekki samkynhneigður. Reyndar er búið að gelda hann en ég held að hann sé samt mjög rómantískur köttur, t.d. heillaði hann eina læðu hérna upp úr skónum um daginn með því að pissa tignarlega á bíldekk.

Fyrsta samkynhneigða parið giftist í kirkju

Víst er þetta Prada

Þegar það kemur að flottum merkjum þá er hann Benedikt kaþólskari en páfinn. Hann hefur ætíð verið þekktur fyrir að láta bera á sér, sumir hafa kallað hann Paris Hilton Páfagarðs, enda er hann ekki frægur fyrir neitt annað en að vera frægur. Annars finnast mér þessi ummæli í fréttinni með að hann klæðist Kristi afar ósmekkleg, það er alger óþarfi að ýja að því að páfinn sé samkynhneigður.

Ég á kött, sem heitir Hrellir, og hann myndi örugglega ganga í Prada skóm ef hann hefði efni á því. Hann þarf samt að safna lengi miðað við þann vasapening sem ég læt hann fá vikulega.

Páfi klæðist ekki Prada

Frábær landkynning!

Mér finnst alveg frábært að Ronaldinho sé að auglýsa íslenskan drykk, því við vitum jú öll að íslenska vatnið er það besta í heiminum! Bara vegna þessa þá hef ég ákveðið að halda með Spánverjum í úrslitaleiknum á EM því mér finnst þetta frábært framtak hjá stráknum. Við getum öll verið stolt af þessum dreng og einnig af þessari vösku sveit fólks sem hefur lagt blóð svita og tár í að gera þennan frábæra drykk að veruleika. Ég ætla út í búð við fyrsta tækifæri til að kaupa eina flösku.

Ég á kött, sem heitir Hrellir, og hann drekkur eiginlega bara nýmjólk eða rjóma. Sumir segja að það sé ástæðan fyrir því að hann sé vel í holdum en ég veit betur, hann er bara örlítið stórbeinóttur. Kannski ég prófi að gefa honum þennan drykk, það sakar ekki að prófa.

Ronaldo auglýsir íslenskan íþróttadrykk