Er ekki stórt H í Hrelli?

Ég held að Mogginn þurfi algerlega að hugsa sinn gang, þessi grein er kolröng frá upphafi til enda. Í fyrsta lagi er Hrellir ekki leikari í sjónvarpsþáttum, og það er ekki á dagskránni. Í öðru lagi er Hrellir ekki „framúrskarandi ljúfur í umgengni.“ Í þriðja lagi er Hrellir löngu hættur að ofsækja fólk og í fjórða lagi er hann ekki frjálslyndur. Það eina sem er rétt í greininni er að til að leika Hrelli þurfi að „kunna hvernig á að vera klikkaður.“ Þetta er Mogganum til háborinnar skammar.

Ég á kött, sem heitir Hrellir, og honum finnst Jennifer Aniston ekki vera góð leikkona. Hann er hrifnari af Courteney Cox.

Aniston í hlutverki hrellis

Farið það kolað í fúlan pytt

Detti mér allar dauðar lýs úr höfði. Til hvers þarf ríkissjóður að taka yfirdráttarlán? Til að kaupa fartölvu? Eða kannski nýjan jeppa? Hvernig væri að draga aðeins úr einkaneyslunni hjá ríkinu í staðinn fyrir að taka lán fyrir henni? Nú er kominn tími til að þeir sem stjórna þessu ríki fari nú að spara aðeins við sig ýmsan óþarfa, t.d. mætti hætta að ausa peningum í asnalega hluti eins og listamannalaun, sinfóníuhljómsveitina, dagpeninga og eftirlaun fyrir stjórnmálamenn, forsetann (nema Dorrit, hún má fá alla þá peninga sem hún þarf), landbúnaðarkerfið o.s.frv. Það væri hægt að eyða þessum hlutum í eitthvað betra, til dæmis væri ég tilbúinn til að sitja á Alþingi fyrir lægri laun en flestir þingmenn þar sem það er frí hálft árið.

Ég á kött, sem heitir Hrellir, og hann er mjög mikið á móti útþenslu ríkisvaldsins. Það er eiginlega eina málefnið sem við erum sammála um. Hann hefur samt ekki kosningarétt ennþá, blessaður anginn. Vonandi verður bætt úr því fljótlega.

30 milljarða króna lán

Ólympíufarar hvað?

Hvað með alla hina ólympíufarana sem fengu enga medalíu? Hefðu þeir fengið þessar móttökur ef handboltaliðið hefði ekki fengið silfurverðlaun? Mér er spurn. Ég vona að fólk gleymi ekki öllu frábæra sundfólkinu okkar sem hefði staðið sig miklu betur ef laugin hefði ekki verið svona ólík þeim á Íslandi og ef dagsformið hefði verið betra.

Ég á kött, sem heitir Hrellir, og hann hatar að synda.

Landsliðið komið heim

Saklaus leikur

Ég skil ekki hvað er verið að fetta fingur út í þetta. Mega krakkar ekki leika sér lengur án þess að lögreglan sé mætt á svæðið? Þarna er alls engin hætta á ferðum, þetta er bara saklaus leikur tveggja drengja. Gæti lögreglan ekki gert eitthvað þarfara eins og að sekta fólk fyrir að virða ekki stöðvunarskyldu?

Ég á kött, sem heitir Hrellir, og hann er mjög löghlýðinn köttur. Einu sinni fór hann óvart yfir götu án þess að fara yfir á gangbraut og ég fór með hann á lögreglustöðina þar sem hann fékk gott tiltal og síðan hefur hann ekki brotið nein lög.

Ofsaakstur á skólalóð

Óþarfa bjartsýni á krepputímum

Á tímum kreppu og harðinda er ekki rétt að gleyma sér í einhverjum fagnaðarlátum yfir því að nokkrir menn með bolta hafi staðið sig betur en nokkrir aðrir menn sem voru ekki eins góðir að kasta bolta. Á sunnudaginn taka svo timburmennirnir aftur við þ.a. ég mæli með því að fólk taki því rólega. Þegar þetta er skrifað stendur gengisvísitalan í rúmum 156 stigum og það er ekkert að fara að breytast þrátt út af einhverju kjánalegu sporti sem enginn fylgist með.

Ég á kött, sem heitir Hrellir, og hann heldur oftast með Norðmönnum í öllum íþróttum þar sem hann er ættaður þaðan. Hann er samt ekki norskur skógarköttur.

Íslendingar í úrslitaleikinn

Bara á menningarnótt?

Hvernig væri að segja nei við nauðgunum alla hina dagana á árinu? Er þarna óbeint verið að hvetja til nauðgana þegar ekki er menningarnótt? Ef ég er að misskilja þetta eitthvað þá er lesendum velkomið að benda mér á það, en mér þykir þetta liggja nokkuð ljóst fyrir.

Ég á kött, sem heitir Hrellir, og hann hefur alltaf verið mikið á móti nauðgunum. Það hjálpar líka til að hann er geldur; það er kannski eitthvað sem karlmenn sem hneigjast til nauðgana ættu að hugsa um?

Segja nei við nauðgunum á menningarnótt

Hvílík vanvirðing!

Þeir sem hegða sér svona eiga svo sannarlega að skammast sín. Hver sá sem klæðist efnislitlum nærbuxum með íslenska fánanum á er ekki sannur föðurlandsvinur. Þannig fólk ætti að senda í skátabúðir uppi á hálendi þar sem hver dagur hefst á fánahyllingu og morgunbæn kl. 6 á morgnana. Þannig er þetta gert hjá skátunum núna og þeir kunna vel að umgangast íslenska fánann. Vissuð þið til dæmis að hjá skátunum eru ákveðnar reglur um hvernig fáninn skuli brotinn saman eftir notkun? Síðan skal hann vera borinn í þeirri hendi sem maður notar til að skrifa með til að sýna honum ekki vanvirðingu. Þá má ekki henda honum þegar hann er orðinn gamall og slitinn, heldur skal brenna hann opinberlega, helst á torgi fyrir framan stjórnarráðið eða fyrir framan íslenskt sendiráð sé maður staddur á erlendri grundu.

Ég á kött, sem heitir Hrellir, og hann er sko sannur föðurlandsvinur. Hann á hálsól með mynd af Jóni Sigurðssyni og kattakassa með mynd af Hr. Ólafi forseta, og hann notar þessa hluti með sönnu stolti yfir því að vera alíslenskur köttur.

Nærbuxur í fánalitum

Hvaða vitleysa er þetta?

Hverjum dettur í hug að stunda svona bjánalega íþrótt eins og þetta? Veit þetta fólk ekki að það er til íþrótt með kylfum sem kallast Golf, og hún er miklu gáfulegri en þetta dæmalausa bjánasport. Til dæmis er það mjög sambærilegt að hlaupa með kylfu og að hlaupa með skæri. Það er eitthvað sem á að vera bannað. Ég vona að þetta fólk sjái að sér og taki upp gáfulegri íþróttir í framtíðinni.

Ég á kött, sem heitir Hrellir, og hann myndi aldrei stunda svona vitleysu. Honum finnst skemmtilegra að horfa á íþróttir í sjónvarpinu enda er það miklu hættuminna og skemmtilegra.

Bandýmenn á leið í Evrópukeppni

Þetta er engin vinna

Það er alveg ótrúleg vitleysan sem fólki dettur í hug. Veit þessi maður ekki að hér er kreppa og að nú eiga flestir sem vettlingi geta valdið að fá sér vinnu og hjálpa þannig samfélaginu. Það er ekki mikið upp úr því að hafa að dansa við einhvern foss úti á landi. Ekki hef ég nú horft á þennan dans enda hef ég ekki áhuga á því, dans er bara fyrir börn og konur. Enginn alvöru karlmaður lætur sjá sig dansandi ódrukkinn, hvað þá einhvers staðar úti á landi.

Ég á kött, sem heitir Hrellir, og hann er ekki gefinn fyrir vinnu. Ég reyndi einu sinni að þjálfa hann til að sækja póstinn fyrir mig en það gekk ekki sem skyldi. Hann á svo erfitt með að halda á lylklinum að póstkassanum vegna þess að hann er með svo breiðar loppur. Kannski ég geti kennt honum að dansa, hver veit?

Milljónir horfa á dansara við Seljalandsfoss

Burt með svona lið

Alveg er það óþolandi að hingað á okkar fína land skuli koma sérvitrir eiturlyfjasalar. Það er margbúið að sanna skaðsemi marijúana plöntunnar, og það á ekki að líðast að hingað komi fólk gagngert til að selja Íslendingum vímuefni. Ég vona að þessi maður verði sendur burt eins og gert hefur verið við aðra glæpamenn hingað til.

Ég á kött, sem heitir Hrellir, og hann segist ekki hafa prófað vímuefni. Hann er samt stundum svo glaður að ég á bágt með að trúa honum. Maður veit aldrei hvað hann er að láta ofan í sig þegar hann er úti, kannski er hann að borða lauf á marijúanaplöntu. Maður veit aldrei með þessi dýr.

Berst fyrir lögleiðingu fíkniefna