Mistök í uppsiglingu

Ef íbúðalánasjóður á að bjarga fólki úr lánasúpu hjá bönkunum, hver er þá að borga fyrir þessar aðgerðir? Jú, það eru að sjálfsögðu bankarnir því þeir fjármagna og reka íbúðalánasjóð. Þetta er það sem við köllum að færa peninga úr öðru veskinu í hitt. Hvað finnst lesendum annars um málið?

Ég á kött, sem heitir Hrellir, og hann borgar ekki neitt fyrir að búa í húsinu mínu. Ég greiði allar afborganir af láninu sjálfur. Ætli það sé hægt að taka lán út á veð í ketti?

Gæti bjargað fjölskyldum frá gjaldþroti

Röng stefna

Er fólk virkilega sektað fyrir að tala í farsíma og að aka bíl? Það finnst mér einum of langt gengið. Ég vona að Ísland sé ekki að fara að breytast í lögregluríki eins og í bókinni 1984 eftir Orwell. Hins vegar er ég mjög hlynntur því að lögreglan sé hætt að elta Íslendinga, enda erum við upp til hópa löghlýðin og kristin þjóð og lítið um svarta sauði.

Ég á kött, sem heitir Hrellir, og hann er mjög löghlýðinn köttur. Hann hvorki ekur né talar í farsíma þ.a. það er mjög ólíklegt að hann verði einhvern tímann sektaður fyrir það. Einu sinni var hann sakaður um að pissa í sandkassa nágrannanna en það var aldrei sannað.

Hætt að elta venjulega Íslendinga

Þetta má ekki

Ég hef alltaf lent í vandræðum með þessar bjánalegu körfur í matvöruverslununum. Ég er ekki hávaxinn maður og þarf alltaf að teygja mig á mjög óeðlilegan hátt til að ná í vörurnar sem eru neðst í kerrunni, og nú er verið að gera þær enn hærri! Svei mér þá.

Ég á kött, sem heitir Hrellir, og hann má ekki koma með mér til að versla. Ég hef reynt allflestar búðirnar, en við erum alltaf reknir út. Oftast eru notaðar einhverjar lélegar ástæður eins og að Hrellir hafi sprænt á vínberjaklasa eða að ég hafi skilið eftir bananahýði á gólfinu.

Matarkarfan hækkar um 5-7%

Símakona?

Mér finnst það eiginlega tímaskekkja að kona sé borgarstjóri. Við höfum ríka hefð fyrir því að karlmenn gegni svona mikilvægum stöðum og það er ekki rétti tíminn að breyta því núna. Það er alkunna hvernig Steinunn Valdís, fyrsti kvenkyns borgarstjórinn, gafst upp á starfinu eftir nokkra mánuði því henni fannst það of erfitt. Ég legg til að þetta verði sett í lög, því ég held að Íslendingar séu nokkuð sammála um að þetta gangi ekki til lengdar.

Ég á kött, sem heitir Hrellir, og hann er ekki læða. Það er reyndar búið að gelda hann en hann lítur samt ennþá á sig sem fress. Enda er sjálfsmyndin það eina sem skiptir máli, ekki hvað aðrir segja.

Símadama á borgarstjóralaunum

Villandi fyrirsögn

Þýðir þetta að selurinn sé ástfanginn af íbúðahverfi? Mér varð ekki um sel þegar ég sá þetta! Þegar ég las svo lengra í fréttinni kom í ljós að selurinn var skotinn með byssu í íbúðahverfi, en það ruglar mig enn meira í ríminu að á myndinni sem fylgir fréttinni er selurinn í fullu fjöri. Nú er ég einn mesti aðdáandi Morgunblaðsins sunnan Alpafjalla en ég get samt ekki látið hjá líða að benda á svona óvönduð vinnubrögð. Ég vona að Siglfirðingar taki ekki upp á því að skjóta öll dýr sem álpast inn í íbúðahverfi héðan í frá, því ef svo er þá fer ég svo sannarlega ekki með Hrelli þangað.

Ég á kött, sem heitir Hrellir, og hann væri líklega frekar hræddur við seli ef hann myndi hitta þá. Hins vegar er hann enn hræddari við vatn þannig að það er mjög ólíklegt að hann hitti nokkurn tíma sel.

Selur skotinn í íbúðahverfi

Líklega ekki gabb

Kannski var þegar búið að slökkva eldinn þegar slökkvilið bar að garði. Mér finnst það nokkur fljótfærni að ákveða að þetta sé gabb áður en það er búið að rannsaka málið að fullu. Kannski ætti að verðlauna þennan einstakling fyrir snarræði? Kannski voru einhverjir óknyttapiltar að kveikja á eldspýtum inni á leikskólanum? Hver veit? Er annars einhver þörf á slökkviliði í bæ þar sem aðeins 1500 manns búa? Ég held að Akurnesingar ættu að skoða þessi mál og kannski er hægt að spara mikið af fjármunum sem er annars ausið í óþarfa. Til dæmis er mér sagt að þarna sé flugvöllur með skúr fyrir farþega sem eru að bíða! Er það ekki fullmikið fyrir 1500 íbúa? Geta þeir ekki notað Reykjavíkurflugvöll eins og aðrir Íslendingar?

Ég á kött, sem heitir Hrellir,  og hann hefur ekki komið til Akureyrar, ekki frekar en ég. Ég efast um að ég muni nokkurn tíma fara þangað enda er ekki mikið að sækja þarna. Ég hef heyrt að þarna séu veður válynd og ekkert útsýni þar sem þetta er innst í þröngum firði. Ég held ég myndi frekar fara til Vestmannaeyja.Hrellir er sammála mér í þeim efnum.

Handtekinn vegna gabbs

Argasta þrugl

Ég sé ekki að þetta ætti að hafa áhrif á okkur á Íslandi, við eigum gjöful fiskimið, góð álver, stöndugt landbúnaðarkerfi og stjórnmálamenn sem passa að Íslendingar haldi áfram að geta keypt jeppa og sushi. Mér finnst óþarfi hjá svona stórum fjölmiðli að reyna að telja okkur trú um að allt sé á heljarþröm, fyrst átti að koma heimsendir og nú á fullt af húsum á Wall Street að hrynja! Jasvei.

Ég á kött, sem heitir Hrellir, og hann hefur fulla trú á að þetta sé stormur í vatnsglasi og að engin hús muni hrynja og að fólk geti haldið jeppunum sínum áfram.

Hrun á öllum mörkuðum

Hárrétt ákvörðun

Ég tek ofan fyrir fjármálaráðherra fyrir að taka djarfa ákvörðun á hárréttum tíma. Hvernig dettur ljósmæðrum í hug að hætta bara í vinnunni sisona? Hvernig eiga fæðingarlæknar að geta starfað eðlilega ef enginn er þar til að halda á lampanum? Eiga börn bara að fæðast í myrkri það sem eftir er? Svo skil ég ekkert í því að ljósfeðrafélagið hafi ekki blandað sér í deiluna ennþá, eru þeir kannski sáttir með sín laun?

Ég á kött, sem heitir Hrellir, og hann fæddist (Hvað er eiginlega rétta orðið fyrir fæðingu kattar? Kastaðist? Gaust? Barst?) um hábjartan dag á jónsmessnótt fyrir u.þ.b. 15 árum og þar var engin ljósmóðir viðstödd. Ég man samt ekki hvort það hafi verið vegna verkfalls.

Gæti leitt til stigmögnunar

Svívirða við vísindin

Ég skil ekki af hverju fólk vill vita hvernig heimurinn varð til. Erum við ekki með þúsundir trúarbragða sem segja okkur að heimurinn er skapaður af guði eða guðum? Það hlýtur bara að vera að einhver ein trúarbrögð hafi rétt fyrir sér þ.a. það sem þarf að gera er að rannsaka öll trúarbrögð heimsins og henda þeim sem eru röng. Þá getum við loksins hætt öllu þessu veseni með vísindi og einhver bjánaleg leiktæki sem eiga að segja okkur eitthvað um tilurð alheimsins.

Ég á kött, sem heitir Hrellir, en hann er ekki mikið fyrir vísindi og þannig vesen. Honum finnst betra að liggja í gluggakistunni og sofa.

Merkisdagur í vísindunum

Frábært, æðislegt!

Mér finnst þetta frábært framtak! Íbúasamtök eru vettvangur fyrir nágranna til að hittast og spjalla saman um sameiginleg áhugamál, sem oftast eru skipulagsmál. Íbúasamtök skapa líka ákveðið aðhald fyrir ríkjandi öfl þannig að þau vaði ekki yfir þegnana.

Hefði Hitler fengið sínu fram ef fólkið í landinu hefði stofnað íbúasamtök? Hefði Apartheid orðið að veruleika í Suður-Afríku ef íbúar hinna ýmsu borga og bæja hefðu hist í ráðstefnusölum og sent frá sér harðorðar ályktanir? Hefði Hringbrautin verið færð ef fólk hefði tekið sig saman og mótmælt?

Líklega ekki. Þess vegna finnst mér þetta frábært framtak; því fleiri íbúasamtök, því betra!

Ég á kött, sem heitir Hrellir, og hann ætti eiginlega að stofna kattasamtök í hverfinu til að mótmæla því að sandkassinn á leikskólanum hérna í nágrenninu er alltaf lokaður á nóttunni þannig að þeir geta ekki pissað og k*kað í hann. Ég býst við að ég laumi þessari hugmynd að honum þegar hann kemur heim á eftir.

Íbúar hræðast aukna umferð