Hrellir er hress

Ég hef fengið fjölmargar fyrirspurnir um það hvernig Hrellir hefur það. Hann hefur það afar fínt þessa stundina, enda fær hann nóg að borða. Hann er reyndar búinn að vera óvenju duglegur að borða undanfarið.

Ég þarf eiginlega að skoða þetta betur. Ég vona að það sé ekkert alvarlegt!

Bölvuð endemis þvæla

Hvaða vitleysa er þetta í ríkisstjórninni að vera að hætta samstarfinu núna einmitt þegar það var farið að ganga vel? Er þetta fólk ekki að hugsa um velferð Íslands og Íslendinga? Svo hafa heyrst raddir um að Davíð Oddsson eigi að hætta í seðlabankanum! Hvaða rugl er þetta? Davíð Oddsson var farsælasti forsætisráðherra Íslands síðan á 17. öld, hann gerði marga góða hluti sem við erum að njóta ávaxtanna af enn þann dag í dag! Ég veit ekki um neinn sem er hæfari en hann til a ðvera í seðlabankanum.

Ég á kött, sem heitir Hrellir, og hann er algjörlega sammála mér. Hann er samt aðeins meiri Geirsmaður en Davíðsmaður, en hann kann samt að meta Davíð fyrir allt það góða sem hann  gerði.

Ekki dauðir úr öllum æðum - teiknisamkeppni

Við Hrellir munum kannski skrifa hér eina og eina grein ef okkur dettur eitthvað sniðugt í hug, það skaðar ekki að kíkja hingað inn af og til.

Núna ætlum við að halda teiknisamkeppni, hvorki meira né minna! Við biðjum lesendur okkar um að teikna mynd af Hrelli, inn á hana skal setja nafn og aldur og svo má senda hana á heildraenar.allsherjarlausnir[hjá]gmail.com. Við munum birta allar myndir sem þið sendið inn!

Kveðja frá mér og Hrelli

Nú vill mbl.is meina að nafn mitt sé ekki til í þjóðskrá og því get ég ekki skrifað færslur við fréttir lengur. Þar sem einkar fáir hafa lagt leið sína á þetta litla afdrep mitt á internetinu þá tel ég að það sé enginn grundvöllur fyrir áframhaldandi skrif mín hér. Ég bið alla afsökunar sem hafa mögulega móðgast við það sem ég hef sagt á þessum vettvangi en þakka um leið fyrir allar fallegu athugasemdirnar sem lesendur hafa skilið hér eftir.

Ég á kött, sem heitir Hrellir, og hann biður alla vel að lifa og vonar að árið 2009 verði betra en árið 2008. Og 2010 líka.

Vondur maður - lélegt lið

Þessir Liverpool menn kunna ekki að haga sér. Við United menn hegðum okkur alls ekki svona, okkur dytti það ekki í hug. Það er augljóst að þetta lið verður ekki meistari úr þessu sem eru góðar fréttir fyrir United menn sem eru miklu fjölmennari á Íslandi, svo höfum við unnið titilinn oftar en nokkuð annað lið.

Gerrard gæti átt fimm ára fangelsi yfir höfði sér

Frábær árangur

Ég á kött, sem heitir Hrellir, og hann er orðinn svolítið gamall og lúinn greyið. Ég held samt að hann hafi arnarsjón því hann þekkir muninn á kattamatardós og t.d. tómötum í dós þegar hann sér mig halda á einni. Ég er því ekki viss um að hann þurfi linsur í bráð, en ég held að hann þurfi heyrnartæki, hann svarar ekki alltaf þegar ég kalla nafn hans.

Köttur fær linsur

Halli er leiðinlegur

Halli er frændi minn og hann er alltaf að vesinast eitthvað inni á heilbrigðisstofnunum, stundum jafnvel undir nafninu Milljarðahalli. Ég vil því biðja fólk um að líta framhjá uppátækjum hans. Hann er alltaf eitthvað að grínast en það má alls ekki gera það í ástandi eins og er núna því fólk gæti móðgast. Aðgát skal höfð í nærveru sálar.

Ég á kött, sem heitir Hrellir, og hann er búinn að vera óvenjulega hress undanfarið. Annað hvort er það vegna þess að það styttist í jólin eða þá vegna þess að ég gef honum aðeins meira að borða en venjulega.

Halli hjá heilbrigðisstofnunum

Landsbyggðarpakk

Hvað er þetta landsbyggðarpakk að skipta sér af málum höfuðborgarinnar?

Ég á kött, sem heitir Hrellir, og hann hefur einu sinni farið með mér í strætó. Það endaði frekar illa.

Óánægja með hækkun strætófargjalda

Amrísk lágmenning

Mér finnst út í hött að fólk sé að tengja jólasveina við jólin; þeir koma þeim bara alls ekkert við! Jólin snúast um skírn jesúbarnsins og finnst mér liggja beinast við að fólk setji syngjandi jesúbarn (sem myndi syngja fallega trúarlega sálma) út á svalir hjá sér og þá gæti enginn kvartað. Ég bið því fólk um að athuga skreytinarnar sínar og henda út öllu sem tengist jólasveinum, snjóköllum eða hreindýrum því það hefur ekkert með jólaboðskapinn að gera. Í staðinn fyrir snjókalla mætti t.d. setja Jósep, Maríu eða heilaga anda, í staðinn fyrir hreindýr mætti setja úlfalda eins og þann sem María og Jósep ferðuðust á til Betlehem. Þannig gætum við losnað við alla þessa amrísku lágmenningu sem flæðir yfir landið í formi kókjólasveina og heiðinna snjókalla og hreindýra.

Ég á kött, sem heitir Hrellir, og hann er mikill jólaköttur. Á jólunum fær hann alltaf soðna ýsu, sem er uppáhaldið hans, og þá borðar hann alveg þangað til hann getur ekki meira og leggur sig í nokkra klukkutíma. Svo vaknar hann til að borða restina.

Jólasveinar valda deilum

Fáránleg kvenremba

Hvernig dettur þessum illa klæddu stúlkum í hug að segja að karlmenn þori ekki að mótmæla? Ég er karlmaður og ég hef mætt á Austurvöll og mótmælt nýlega! Það var á síðasta laugardag þegar ég, ásamt mörg þúsund manns, mótmælti því að ráðamenn þjóðarinnar ætluðu að breyta orðinu ráðherra í ráðfrú! Þær vita kannski ekki þessar stelpur að á Íslandi er hefð fyrir því að vera vel klæddur í mótmælum, og svo á maður alls ekki að trana sér fram, því á Íslandi er hefð fyrir því að mótmæla kurteislega.

Ég á kött, sem heitir Hrellir, og hann er búinn að borða og sofa óvenjulega mikið síðustu daga, ég skil bara ekki af hverju. Hefur einhver annar kattaeigandi lent í þessu?

Í eigin skinni á Lækjartorgi