Hvernig fæ ég peningana mína?

Ef Glitnir hefur stöðvað greiðslur, get ég þá ekki tekið út peningana mína? Ég á tugi þúsunda króna á tékkareikningi þarna og ég þarf að geta nálgast þessa peninga þegar ég þarfnast þeirra! Það er algjör hneysa að Héraðsdómur veiti þeim heimild til þessa fáránlega gjörnings. Sem betur fer á ég nokkra þúsundkalla hjá Kaupþingi sem ég get sótt ef í harðbakkann slær, þeir myndu nú ekki reyna að sækja um svona bjánalega heimild.

Ég á kött, sem heitir Hrellir, og hann hefur verið óttalega svangur upp á síðkastið. Hann er búinn að bæta við sig hálfu kílói á nokkrum mánuðum þ.a. hann er kominn vel á áttunda kílóið! Það er svo sem fínt, þá er bara meiri köttur fyrir mig til að klappa.


mbl.is Glitnir fær greiðslustöðvun
Tilkynna um óviðeigandi tengingu við frétt

Heppni og ekkert annað

Það er óþolandi þegar lakara liðið vinnur fótboltaleik. Þó svo að Arsenal hafi skorað fleiri mörk en Manchester þá þýðir það ekki að þeir hafi átt sigurinn skilinn. Síðan hvenær var það talið heillavænlegt í fótbolta að bíða í vörn eftir að hinir komi með boltann og sparka svo fram og vona það besta þegar færi gefst? Auk þess eiga Arsenal menn enga alvöru stórstjörnu í liðinu eins og Wayne Rooney eða Cristiano Ronaldo. Ég vona því að þetta hafi bara verið heppnissigur í þetta skiptið og að þetta gerist ekki aftur.

Ég á kött, sem heitir Hrellir, og hann hefur engan áhuga á fótbolta. Hann heldur samt aðallega með Tottenham.


mbl.is Arsenal lagði Englandsmeistarana, 2:1
Tilkynna um óviðeigandi tengingu við frétt

Af hverju er þetta ólöglegt?

Þessi maður (af hverju er það tekið fram að þetta hafi verið maður en ekki kona?) hefur greinilega lagt þó nokkra vinnu í að gera þennan seðil, og útkoman er hreint ekki slæm. Nú hefur átt sér stað gengishrun og verðbólgan er komin upp úr öllu valdi þ.a. það er komin þörf fyrir nýjan og stærri seðil. Því ætti seðlabankinn í rauninni að verðlauna þennan mann fyrir að hafa sparað þeim ómakið við að hanna seðilinn. Svo er t.d. munurinn á 500 og 5000 króna seðlum aðeins sá að þeir eru öðruvísi á litinn og það er eitt auka núll á þeim síðarnefnda. Ekki er fólk handtekið fyrir að nota 5000 króna seðla þ.a. þegar einhver kemur með fallegan seðil sem er rétt merktur eftir kúnstarinnar reglum ætti að sjálfsögðu að taka hann góðan og gildan eins og starfsfólkið gerði í þessu tilfelli.

Ég á kött, sem heitir Hrellir, og hann er ennþá mjög leiður yfir því að ekki sé hægt að nota 100 krónu seðla lengur. Ég sendi hann stundum út í sjoppuna hérna nálægt til að sækja bland í poka og það var miklu auðveldara að festa seðla á feldinn á honum heldur en 300 krónur í klinki. Maður þarf að nota meira límband og honum finnst svo vont þegar ég tek límbandið af því það rifna nokkur hár úr feldinum um leið.


mbl.is Notaði seðil með mynd af Davíð
Tilkynna um óviðeigandi tengingu við frétt

Er þetta mér að kenna?

Er verið að gera því skóna að ég beri ábyrgð á þessu? Ég horfi oft á Ríkisútvarpið en það er ekki þar með sagt að það sé mér að kenna að illa gangi að reka einhverja vídjóleigu í gegnum netið. Hvernig getur það annars gengið? Það vantar alla upplifunina í það að panta kvikmhynd í gegnum internetið, til dæmis vantar alveg þetta sérstaka hljóð sem heyrist þegar maður opnar spóluhulstrið og eftirvæntinguna þegar maður setur spóluna í tækið. Svo kemur maðurinn sem segir að það sé góð skemmtun að horfa á kvikmynd. Svo fylgir alltaf ánægjutilfinning því að spóla myndinni til baka fyrir næsta mann.

Ég á kött, sem heitir Hrellir, og hann hefur lítinn áhuga á kvikmyndum nema þær fjalli á einhvern hátt um kattamat (sem er frekar sjaldgæft).


mbl.is Skjárinn segir öllum upp
Tilkynna um óviðeigandi tengingu við frétt

Ég fékk ekki bréfið!

Sagt er í fréttinni að þetta bréf hafi gengið á milli manna á Íslandi. Ég bý á Íslandi og ég hef ekki séð það fyrr. Því finnst mér líklegt að þarna sé verið að fara með rangt mál, þ.a. bréfið er líklega falsað. Ég lagðist í smá rannsóknarblaðamennsku (notaði leitarvél sem heitir Google, sjá leit) og komst að því að Jónína S. Lárusdóttir er ekki að vinna í téðu ráðuneyti, og líklega ekki til á Íslandi. Þetta hefðu blaðamenn mbl.is átt að vera búnir að gera mikið fyrr, a.m.k. áður en fréttin fór í loftið.

Ég á kött, sem heitir Hrellir, og hann telur að þetta bréf sé ófalsað, þrátt fyrir að ég hafi sýnt honum fram á þessa uppgötvun mína. Stundum held ég að hann sé ósammála mér bara til að fara í taugarnar á mér. Það virkar alla vega hjá honum.


mbl.is Geysirgate: Dularfulla bréfið
Tilkynna um óviðeigandi tengingu við frétt

Ég er bandbrjálaður af bræði!

Hvernig dettur þessum Norsara í hug að gera grín að okkur með þessum hætti? Er þetta kannski vegna þess að við unnum Þorskastríðin og Smugudeiluna? Er þetta kannski öfund? Ég sver það hér með og sárt við legg að ég mun aldrei, ALDREI kaupa Maarud snakk aftur og þar að auki mun ég aldrei kaupa mér IKEA húsgögn meðan ég lifi. Nú er það bara Rúmfatalagerinn fyrir mig, Færeyingar munu aldrei svíkja okkur.

Ég á kött, sem heitir Hrellir, og hann vill taka það skýrt fram að hann er ekki norskur skógarköttur.


mbl.is Norðmenn draga Íslendinga sundur og saman í háði
Tilkynna um óviðeigandi tengingu við frétt

Tedrekkandi hyski

Bölvaðir Bretarnir eru einnig farnir að vera okkur óvinveittir, eins og Danirnir. Ég er alveg bandbrjálaður, ég mun grafa allar Spice Girls og Oasis plöturnar mínar í bakgarðinum til að mótmæla þessu. Auk þess mun ég hætta að versla allar þær vörur sem breskar eru. Kannski við munum upplifa þorskastíðin aftur, hefur einhver áhuga á því? Eru búið að hanna nýja tegund af klippum?

Ég á kött, sem heitir Hrellir, og hann borðar ekki fisk, ef honum fylgja franskar. Það er til þess að mótmæla þessum bölvuðu stælum í Bretunum.


mbl.is Mjög óvinveitt aðgerð
Tilkynna um óviðeigandi tengingu við frétt

Hvílík hneysa!

Að svona skuli koma frá þjóð sem við Íslendingar höfum dáð og dýrkað frá því Ísland byggðist! Við höfum hyllt Margréti drottningu, Kim Larsen, Ólsen gengið og fleiri og fleiri Dani og ávallt tekið þeim vel þegar þeir koma til okkar. Einnig hafa Danir tekið frægum Íslendingum opnum örmum, til dæmis er frægt þegar Stuðmenn léku fyrir fullu húsi í skemmtigarði og sjálfur Björgvin Halldórsson gerði slíkt hið sama fyrir nokkrum mánuðum. Núna virðist vera sem þessi góðu tengsl milli landanna séu á bak og burt fyrst Danir eru farnir að gera grín að vandamálum okkar. Þeir mega svo sannarlega skammast sín, og þeir geta ekki gert ráð fyrir mínum stuðningi lengur ef það kemur að því að innlima Ísland aftur inn í Danmörku.

Ég á kött, sem heitir Hrellir, og hann er miður sín yfir því hvernig ástandið er í þjóðfélaginu. Kattamatur hækkar úr öllu valdi, smáfuglarnir horast og fólk á ekki fyrir mjólk lengur til að setja í skál fyrir hann. Ég hef samt ekki eins miklar áhyggjur, því að á meðan við Hrellir eigum hvorn annan þá getur engin kreppa haft áhrif á okkur.


mbl.is Söfnun fyrir Ísland
Tilkynna um óviðeigandi tengingu við frétt

Bull frá upphafi til enda

Hverjum dettur í hug að setja einhver lög um banka þegar allt er að fara til fjandans á landsbyggðinni? Má ég nefna að það eru engir bankar á landsbyggðinni þannig að þessi lög gera ekkert fyrir það fólk. Í staðinn fyrir að standa í svona rugli mætti kannski gera eitthvað gagnlegt. Veit ríkisstjórnin ekki að Kattholt er orðið yfirfullt af köttum? Hvernig væri að hjálpa þeim? Svo er farið að kólna í veðri, hver ætlar að gefa smáfuglunum að borða? Á ég að gera það? Þetta er alveg út í hött.

Ég á kött, sem heitir Hrellir, og hann hefur sérstaklega miklar áhyggjur af því að smáfuglarnir verði illa haldnir og magrir í vetur, vonandi að ríkisstjórnin sjái að sér.


mbl.is Neyðarlög sett í dag
Tilkynna um óviðeigandi tengingu við frétt

Fáránlegur gjörningur

Nú er mér öllum lokið. Það er búið að loka fyrir alla fjármálagerninga hjá Glitni út af einhverjum bjánagangi hjá Ríkisvaldinu. Hvernig á ég að leggja inn ellilífeyrinn minn núna? Svo þarf ég að millifæra smá peninga inn á reikninginn hans Hrellis, hvernig í fjáranum á ég að gera það? Er bara búið að frysta peningana mína? Ég heimta skýringar; ef bankastjóri eða starfsmenn Glitnis lesa þetta þá væri ég alveg til í að heyra þeirra hlið.

Ég á kött, sem heitir Hrellir, og honum er öllum lokið núna þar sem hann fær ekki vasapeninginn sinn fyrir þessa viku. Ég á nokkra hundraðkalla undir koddanum en hann fær ekki mikinn kattamat fyrir það. Hann er mikill orkubolti og þarf því mikið að borða.


mbl.is Ríkið eignast 75% í Glitni
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband